မြစ်ချောင်းများ ပြန်လည်ထူထောင်ရေး နှိုးဆော်ချက်
တရားမျှတပြီး ရေရှည်တည်တံ့သော ပြန်လည်ထူထောင်ရေးအတွက် မြစ်ချောင်းများ၊ ရပိုင်ခွင့်များကို မဖြစ်မနေ ကာကွယ်ဖို့ ကမ္ဘာလုံးဆိုင်ရာ တောင်းဆိုချက်
မြစ်ချောင်းများ ပြန်လည်ထူထောင်ရေး နှိုးဆော်ချက်
တရားမျှတပြီး ရေရှည်တည်တံ့သော ပြန်လည်ထူထောင်ရေးအတွက် မြစ်ချောင်းများ၊ ရပိုင်ခွင့်များကို မဖြစ်မနေ ကာကွယ်ဖို့ ကမ္ဘာလုံးဆိုင်ရာ တောင်းဆိုချက်
ကိုဗစ်-၁၉ ကမ္ဘာ့ကပ်ရောဂါကြောင့် ပြည်သူ့ကျန်းမာရေးနှင့် စီးပွားရေး အကျပ်အတည်းဆိုက်ပြီး ကမ္ဘာအနှံ့ လူပေါင်းများစွာ ဒုက္ခရောက်နေကြပါသည်။ နောက်ချန်ဖယ်ကြဉ်ခံရသော၊ ထိခိုက်လွယ်သော အုပ်စုများမှာ အများဆုံး ဒုက္ခခံကြရပါသည်။ အဆိုပါ အကျပ်အတည်း များကြောင့် လက်ရှိ စီးပွားရေး၊ စွမ်းအင်နှင့် အစားအစာစနစ်တို့တွင် များစွာ ပြောင်းလဲလာသည့် တုန်လှုပ် ချောက်ချားဖွယ်ရာ အခြေအနေများသည် တုံ့ပြန်ဆောင်ရွက်မှု အပြောင်းအလဲ ကိုလည်း လိုအပ်နေကြာင်း ပြသ နေပါသည်။ ကျယ်ပြန့်စွာ ဖြစ်ပွားနေသော စီပွားရေးချွတ်ခြုံကျမှု၊ အငတ်ဘေး၊ အလုပ်လက်မဲ့ပြဿနာ၊ ပတ်ဝန်းကျင် ပျက်စီးမှုတို့ကို ဖြေရှင်းရန် လူမှုတရားမျှတမှုနှင့် ဂေဟစနစ်တည်တံ့မှုကို ဗဟိုပြု၍ ပြုပြင်ပြောင်းလဲရေးကို စတင်ရန် လိုအပ်လာပြီ ဖြစ်ပေသည်။
မြစ်ချောင်းနှင့် ရေချိုဂေဟစနစ်တို့သည် ကိုဗစ်အလွန်ကာလတွင် ကမ္ဘာ့ စီးပွားရေး ပြန်လည်ထူထောင်ရန်အတွက် အသက်သွေးကြောတမျှ အရေးကြီး လှပါသည်။ မြစ်ချောင်းများသည် သဘာဝဂေဟစနစ်များကို အားကောင်းစေရန် ပံ့ပိုးသည့်အပြင် ဝင်ငွေနိမ့်နှင့် အလယ်အလတ် ဝင်ငွေရရှိသည့် နိုင်ငံများမှ ဆင်းရဲနွမ်းပါးသူများ၊ ထိခိုက်လွယ်သူများအတွက် စီးပွားရေးတည်ငြိမ်မှုကို ကွန်ချာတစ်ခုသဖွယ် အကာအကွယ်ပေးပါသည်။ ကမ္ဘာမြေ၏ အသက် သွေးကြောများဖြစ်သည့် မြစ်ချောင်းများကို မျိုးဆက်ပေါင်းများစွာ ဆည်၊ တာတမံများ တည်ဆောက်ခြင်း၊ မြစ်ကြောင်းပြောင်းလဲခြင်း၊ ညစ်ညမ်းစေခြင်း တို့ ပြုလုပ်ခဲ့ကြသည့်အတွက် လူပေါင်းများစွာနှင့် သက်ရှိတို့၏ ကမ္ဘာမြေပေါ် ရှင်သန်ရပ်တည်မှုစနစ်များတွင် ကပ်ဆိုးကြီးတစ်ခု ကျရောက်သည့် အခြေအနေ အထိ ပေးဆပ်ခဲ့ရပြီးဖြစ်ပါသည်။ ယခုအခါ ရေချိုနေသတ္တဝါမျိုးစိတ် သုံးမျိုးတွင် တစ်မျိုးသည် မျိုးသုဉ်းသွားခြင်း ပြဿနာကို ရင်ဆိုင်နေရသည်။
ယနေ့ကြုံတွေ့နေရသော ကမ္ဘာ့ကပ်ရောဂါသည် လက်ရှိစနစ်ထဲမှာပင် မညီမျှမှုများစွာ၊ စိန်ခေါ်မှုများစွာ ရှိနေကြောင်း မီးမောင်းထိုးပြနေပါသည်။ သမိုင်းကြောင်းတစ်လျှောက် ပျက်စီးလာခဲ့သော ကျွန်ုပ်တို့၏ မြစ်ချောင်းများနှင့် ရေချိုစနစ်များကို အနာဂတ်တွင် ပြုပြင်ပြောင်းလဲရန် အခွင့်အရေးကိုလည်း ပေးအပ်နေပါသည်။ ကျွန်ုပ်တို့၏ သဘာဝ စနစ်များကား ကမ္ဘာပေါ်ရှိ သက်ရှိတို့ဘဝအတွက် မရှိမဖြစ်လိုအပ်ပါသည်။ သို့သော် ၎င်းတို့အား နှစ်ပေါင်းများစွာ တန်ဖိုးမထားဘဲ လိုသလို အသုံးပြုခဲ့ကြပြီး အခွင့်ထူးခံ လူနည်းစုအကျိုးအတွက် “ဖွံ့ဖြိုးတိုးတက်မှု” အမည်ခံကာ အမြတ်ထုတ် အသုံးချခဲ့ကြပါသည်။ ဤသို့သုံးစွဲခြင်းမှာ ရေရှည်မတည်တံ့နိုင်သော လမ်းကြောင်းဖြစ်သည်ဟု တစ်ကမ္ဘာလုံးက နားလည်လာကြသည်။
မြစ်ချောင်းများကို အသုံးချစီမံခန့်ခွဲမှုနဲ့ ပတ်သက်၍ အယူအမြင်သစ်ရှိရန်မှာ အရေးကြီးလှပါသည်။ မြစ်ချောင်းများကို သက်ရှိဘဝများနှင့် ပြည်သူ့ ကျန်းမာရေးတို့အတွက် အစားထိုးမရသည့် ရေအရင်းအမြစ်များအဖြစ် ကာကွယ်ပေးရမည်သာမက ကိုဗစ်-၁၉ ကပ်ဘေးကြောင့် ကြွေးတင်ပြီး လူမွဲနိုင်ငံများ ဖြစ်မလာစေရန် ဟန့်တားနိုင်ရန်အတွက် တရားမျှတ သော စွမ်းအင်အကူးအပြောင်းကို အရှိန်အဟုန် မြှင့်တင်ဆောင်ရွက်ရန် လိုအပ်ပြီး ရာသီဥတုကပ်ဘေးကို ထိထိရောက်ရောက် အံတုရင်ဆိုင်နိုင်အောင် လုပ်ဆောင်ရပါမည်။ ဝင်ငွေနိမ့်နိုင်ငံများနှင့်၊ အလယ်အလတ်အဆင့် ဝင်ငွေရနိုင်ငံများတွင် လတ်တလော၌ တာတမံများတည်ဆောက်ခြင်းကို အရှိန်အဟုန်မြှင့် တွန်းအားပေးဆောင်ရွက်နေမှုသည် အဆိုပါလုပ်ငန်းစဉ်ကို ခြိမ်းခြောက်နေပြီး ၎င်းမှာ “စိမ်းလန်းသော” စီးပွားရေး ပြန်လည်ထူထောင်မှု အမည်ခံကာ ရေအားလျှပ်စစ်လုပ်ငန်းကို မြှင့်တင်နေသည့် မှားယွင်းသော စွမ်းအင်ဖြေရှင်းချက်တစ်ရပ်ဖြစ်သည်။
စီးပွားရေးပြန်လည်ထူထောင်မှုအတွက် လမ်းမှားတစ်ခုမှာ ကြွေးမြီများစွာ ကြောင့် ရုန်းကန်နေရသည့် နိုင်ငံများအတွက် အကြွေးပေါ် အကြွေးဆင့်စေခြင်း၊ ရှားပါးသည့် ရန်ပုံငွေများကို ပိုမိုကောင်းမွန်သော နည်းလမ်းများအတွက် အသုံးမပြုဘဲ “သဘာဝပတ်ဝန်းကျင်ထိန်းသိမ်းရေး လုပ်ဆောင်နေဟန် ဝါဒဖြန့်သည့်” ဖြေရှင်းချက်များကို ဦးစားပေးခြင်း၊ ရေကာတာကြီးများနှင့် ရုပ်ကြွင်းလောင်စာများကဲ့သို့ ပတ်ဝန်းကျင် ထိခိုက်စေသော စီမံကိန်းများဖြင့် ရေးဆွဲတည်ဆောက်ထားသော ပင်မဓာတ်အားလိုင်းကြီးများကို မြှင့်တင်ခြင်း၊ ပတ်ဝန်းကျင်နှင့် လူမှုအကာအကွယ်များကို အားနည်းစေခြင်းနှင့် ရေချို အလွဲသုံးစားပြုမှု ဆက်လက်ဖြစ်ပွားနေခြင်းတို့ဖြစ်ပါသည်။
ရေအားလျှပ်စစ်ထုတ် ဆည်တမံများသည် မှားယွင်းသော ဖြေရှင်းချက်ဖြစ်ပြီး စိမ်းလန်းသော ပြန်လည်ထူထောင်ရေးကို မဖြစ်ပေါ်စေနိုင်ဘဲ ပတ်ဝန်းကျင်နှင့် လူမှု ဂယက်ရိုက်ခတ်မှုများစွာ ဖြစ်စေသည်။ ဆန့်ကျင်ဘက်အနေဖြင့် နေစွမ်းအင်နှင့် လေစွမ်းအင်သုံး နည်းပညာများတွင် ရင်းနှီးမြှုပ်နှံခြင်းသည် ကုန်ကျစရိတ်သက်သာပြီး လျင်မြန်ထိရောက်စွာ အသုံးပြုနိုင်ကာ စီးပွားရေး ပြန်လည်ထူထောင်မှုတွင် ငွေကြေးကုန်ကျမှု မရှိဘဲ အလုပ်အကိုင်များ ဖန်တီးပေးနိုင်သည်။ ပိုမိုကောင်းမွန်သော အနာဂတ်တစ်ခု ပြန်လည် တည်ထောင်ရန်အလို့ငှာ စီးပွားရေး ထောက်ပံ့ငွေများသည် သက်ဆိုင်မှုမရှိဘဲ ငွေကြေးထောက်ပံ့မှု လျင်မြန်စွာ ဆုံးရှုံးနေသည့် ပတ်ဝန်းကျင်ထိခိုက်စေသော လုပ်ငန်းများအတွက် ချေးငွေ ထုတ်ပေးခြင်းထက် ရပ်ရွာလူထု အခွင့်အရေးများနှင့် ပါဝင်ဆောင်ရွက်မှုကို ဦးစားပေးသည့် ထိခိုက်လွယ်သော လူထုများ၊ ဂေဟစနစ်များကို အကျိုးပြုသည့် ထိခိုက်မှုနည်းပါးသော နည်းပညာများတွင် ရင်းနှီးမြှုပ်နှံသင့်ပါသည်။
ရာသီဥတုဆိုင်ရာ တရားမျှတမှုတွင် အခြေတည်၍ အကျိုးအမြတ်ရရှိရန်နှင့် စီးပွားရေး ဖွံ့ဖြိုးစေရန်အတွက်ဟုဆိုကာ မြစ်ချောင်းများကို တာတမံများ တည်ဆောက်ခြင်း၊ ညစ်ညမ်းစေခြင်းထက် ဇီဝမျိုးကွဲစုံလင်မှု၊ ရေထောက်ပံ့မှု၊ အစားအစာထုတ်လုပ်မှု၊ ဌာနေတိုင်းရင်းသားများနှင့် အခြားယဉ်ကျေးမှုအရ ကွဲပြားစုံလင်သည့် ကမ္ဘာတစ်ဝန်းမှ ပြည်သူများကို ပံ့ပိုးပေးနေသည့် အရေးပါသော အသက်သွေးကြောများအဖြစ် မြစ်ချောင်းများကို ကာကွယ်ပေးမည့် ပြန်လည်ထူထောင်ရေးကို ကျွန်ုပ်တို့က လိုလားပါသည်။